مقال بالدارجة : مابين قهوة و قهوة كاينة قهوة
برشيد الغد : زكرياء البرجي
قبل ما نديو و نجيبو في الكلام هاد مقال بالدارجة فقرة كل سيمانة ناقشو فيها موضوع ولا قضية ولا ظاهرة حيت جربنا كل الطرق باش نوصلو ميساج لاكن والو قلنا نجربو الدارجة على الله .
من الحويج لي نتاشرو و كترو مؤخرا ببرشيد هما القهاوي ، وليتي فين مادرتي تلقا قهوة و تفوتها تلقا وحدة خرى و مكينش شي درب متلقاش فيه شي قهوة ، و كتلقاهم مستفين حدا بعضياتهم بحال السرديل .
و لي فهمت من هاد الضاهرة ان المواطن معدو مايدار مسالي مع راسو كين غا القهوة ، و هاد المشروع ولا هو أول ما كيفكر فيه شي واحد جمع شي براكة تاع الفلوس ولا جا من الخارج و بغا يروج القضية ، هنا فين كيبان التفكير المحدود و عدم استتمار هاد الفلوس في شي حويج ترجع بالنفع ، يمكن فلوس القهوة دير بيها شي مقاولة تخدم بيها الشباب و النساء مثلا ؟ .
ما علينا ، المشكل كيزيد ملي هاد القهاوي كتستغل الرصيف و كتحتل الملك العام و تا حد من المسؤولين ما قد يدير شي حل ، الا ضربتي دويرة في المدينة غتلقا كاع القهاوي معمرين تريطوار كامل بالكراسا و لي شاط حاطين فيه محابق ولا مغطينو بباش .
هاد الناس مكرهوش تا الشانطي يعمروه ، و على حساب سكات و تماطل السلطات غنشوفوها قريب و مغتقدش تدوي نتا ، الامر لي ولا عادي و لحد الان عمر السلطات مخدات شي بادرة لتحرير الملك العام لي مستغلينو اصحاب هاد القهاوي اش كتسناو ؟ زعما حنا لي غالطين و هاد الناس خدامين قانونيا ؟ .
المهم لي بغا يدير قهوة الله يسهل عليه فوت غا تريطوار راه ديالنا و لا عمرتيه غنجي ناخد حقي من الروسيطا تاع القهوة و شكرا .