Modawenon

‫#‏العيلم_وداكشي‬ المقال الثاني

رفع الصور
رفع الصور
برشيد الغد-بكلافي عبيقة
#السقوط_الى_الاعلى

 تخيل راسك كاطل من السرجم فالسطح وزارع ليها "بيروش ولد العبدية" فالودينات وشاد فيدك الليمنية ياجورة (زعما آجورة ماشي ياجورة زوجة ياجور) و فيدك الليسرية شاد حجرة صغيرة قد الزيتونة، يعني الليد الليمنية ثقيلة بزاف كثر من الليسرية ، وتخيل دابا أنك طلقتيهم فنفس اللحظة إوا شكون فيهم غاتوصل الأولى للأرض؟

اعطي شي فرضية بعدا غير بينك وبين راسك كجواب وإن لم تفعلها فاعلم أن عبيقة منعك.

 راه ممكن يجيك السؤال ساهل وبسيط، ولكن الجواب تاعو (على قول الحاج عبد المغيث) قلب وشقلب المنظور تاع العيلم والمنهج باش كانوا غادين العولامة فقديم الزمان رأسا على عقب، ومن جهة أخرى تويشيات بسيطة بحال هاذي الانسان العادي يقدر مايديهاش فيها ولكن بالنسبة للعيلم و العولامة كلشي عندو تفسير.

 أولا نرجعوا بالزمن شويا اللور ونعطيو السياق التاريخي تاع هاذ البلان، هذا واحد فلان فرتلان (كيفما خلاها مول القبعة) سميتو أرسطو طاليس (384-322ق.م) ، كان شبعااان عيلم وداكشي، ماكايتقاداش وخيبراطور فالطلقة، كان تلميذ تاع أفلاطون وماخلا فاش هضر فالفيزيك الرياضيات السياسة الميتافيزيقا الشعر المسرح الأخلاق المنطق الخطابة والأحياء والموسيقى وشلا بوكو مجالات، وعلى ذكر الموسيقى دياسك كاملين لي بادين ب "اعطني" راهم دياولو:

 "اعطني شي سوفونير وعاد الحبيب ديالي سير"
"اعطني الفيزا والباسبور" 
"اعطني صاكي باغا نماكي"
"اعطني حريتي أطلق يديا"

 واللائحة طويلة.

 ما علينا هاذا كان سيفي تاع خونا لي أسس مبادئ العيلم فالعصر تاعو هو وشي محسينين بحال مسيو بطليموس (لي هضرنا عليه فالمقال الأول)، وراه واخا كانوا غالطين فكثير من الأشياء لي تصححات من بعد إلا أنهم خلاو واحد الارث حضاري وثقافي عظيم، إوا اسيدي ومولاي الأجيال لي جات من موراهم ورتات هاذ المبادئ العلمية والفكرية وخداتها بحال المسلمات يعني صحيييحة ولا نقاش فيها.

 ومن بين نظرياته (أرسطو) أن الأجسام الثقيلة تسقط بسرعة أكبر لأنها وببساطة أكثر وزنا، يعني هاد خونا كايجاوب على البلان باش بدينا أن الياجورة الثقيلة غاتسبق الحجرة الصغيرة فالوصول للأرض!!!

 لحد هنا المسألة كاتبان معقولة وبقات القدية غادية على هاذ الحال تاجا واحد خونا فالله سميتو غاليليو غاليلي وهاذ خونا السيفي تاعو خاصو كتاب ماشي مقال، كلمحة علا هاذ العالييم كان طالياني دوريجين تزاد ف 15 ﻓﺒﺮﺍﻳﺮ 1564 بمدينة مشهورة سميتها "بيزا" فإيطاليا ومات يوم 8 ﻳﻨﺎﻳﺮ 1642 ويلا كانتو جارين معايا العشرة راه دوز الجينيراسيون تاع عصر النهضة بأروبا وفحياتو عطى بزاف للبشرية سوا فالفلسفة ولا فالفلك ولا الفيزيك والرياضيات وعاد الاختراعات ديالو بحال التيرمومتر والتلسكوب ... وكاينين شي أَّتويش ديالو مزالين كايتقراو ليومنا هذا، وتااااهو مسكين ماخلات مادوزات عليه الكنيسة (الكاثوليكية) فذاك الوقت، فآخر حياتو دوزها إقامة جبرية فالبرتوش عندو وتاهموه بالهرطقة (قالوا ليه زعما راك غي كاتهترس) باش تعرفوا راه حتى واحد مالقاها كيف بغاها.

 وحنا لي كايهمنا فالامر أن السي غاليلي تاهوا عطى جواب على المسألة تاعنا ولكن هاذ المرة بسند علمي محض وبتجارب ماخلات حتى منفذ شك، برهن نظريا باستعمالا الرياضيات وعمليا بتجربة شهيرة قام بيها فبرج بيزا الشهير فإيطاليا (البرج المائل) بحيث طلع الفوق ورمى قذيفتين وحدة أثقل بكثير من الثانية وكانت النتيجة أن القذيفتين وصلو فنفس اللحظة لسطح الأرض وصاغ على هاذ الشي قانون سماه "قانون الأجسام الساقطة"، والنتيجة تاع التجربة لي دار هي الجواب تاع الياجورة والحجرة يعني غايوصلو بجوج فدقة وحدة إلى مافلقتيش بيهم شي واحد بيان سير.

 والجميل فالامر أن مسائل بسيطة بحال هاذي كاتعطي نتائج هائلة راه غي أبحات عادية فهاذ الستون خلات غاليليو يكتشف شي حاجة سميتها التسارع وعطى الفرق بينها وبين السرعة وأسس مبادئ فالميكانيك (أو بالاحرى الديناميك)، وزاد بحت أكثر وعطا تفسير علمي علاش الكواكب والأقمار كاتبقا كاتحرك بثبات فالمدارات (أفلاك) ديالها، وبدع فأمور كثيرة غي بسباب هاذ الستون الحلزون، وأغلب العولامة استافدوا بزاااف من داكشي لي خلا هاذ السيد وعلى سبيل المثال "إسحاق نيوتن" اعتامد بالأساس على الأبحات تاع غاليلي فالميكانيك باش توصل هو لصياغة قوانين الحركة لي شكلو ثورة فالفيزياء والهندسة بالخصوص، وكايقولو بالمجهودات ديال غاليلي وديال واحد الكليكة تاع العولامة فياماتو هوما لي أسسوا مبادئ العلم الحديث ودخلوا المنهج التجريبي كأداة للإقناع والبرهنة ومابقاش العيلم كايعتمد فقط غير على الملاحظة ولا شي حاجة سميتها البديهيات وكل شي ولا خاضع للتجريب ، وبالتضحيات ديال هاذ الناس كانتمتعوا حنا فهاذ الزخم تاع التكنولوجيا والازدهار المعرفي والتقدم لي عرفاتو البشرية.

 فالأخير بغيت نقول واحد الكلمة لسي غاليلي راك مخطئ جدا حيتاش ضيعتي بزاف تاع الوقت ونتا كاتقلب كيفاش تصيغ قانون الاجسام الساقطة وخليتي ما هو أهم أنك تعطينا شي قانون ولا شي طريقة نتعاملو بيها مع الشخصيات الساقطة.


ليست هناك تعليقات:
إرسال تعليق