برشيد الغد-بكلافي عبيقة
الأرض مركز الكون !!!
هذا واحد خونا فالله سميتو كلاوديوس بطليموس الله يسمح ليه فهاذ النهار، خونا مامتورخش مزيان فالحالة المدنية ولكن أغلب البحوث كاتقول بلي مزيود جوايه الطناش تاع النهار فالقرن
الثاني ميلادي فالإغريق.
السّي بطليموس كان عالم رياضى و جغرافي وعالم فلك و منجم...الخوت السيد سبع صنايع والرزق ضايع وهو صاحب دعوتنا مول النظرية تاع "الأرض مركز الكون"، ماعلينا هاذ النظرية تبنَّاتها الكنيسة أبْخي (خصوصا الكنيسة الكاثوليكية) وما أدراك ما الكنيسة فذاك الزمان،المهم بنات عليها أفكار و معتقدات وحاربات كل من تخول له نفسه أن يفنِّد هاذ النظرية (ونظريات أخرى!) وصافي ولا كولشي مآمن بأن الأرض هي مركز الكون.
إوا نعاماسِّي ما بعيدا غي تادلة (واخا تاهيا مابقاتش بعيدا مع وجود الشيخ الصمدي)... زعما مابعيد شاي الحال حتى تزاد واحد كحل الراس سميتو نيكولاس كوبرنيكوس و من بعد غاتعرفوا علاش كنِّيت عليه كحل الراس واخا السيد راهب وعالم رياضي وفيلسوف فلكي وتاع القانون و طبيب و إداري ودبلوماسي وجندي بولاندي وزيييييد وزيييد... كان شبعان عيلم مع راسو وواحد من أعظم العلماء في عصره، وقالوا خونا رمَّان مكلاسي الأول وسط ربعة تاع العولامة آخرين لي هوما : براهة وكيبلر وغاليليو غاليلي ونيوتن، وهوما لي فايقوا أوغوبا من الشخير اللي كانت فيه، الحاصول من اللخر خونا رمَّان كان عندو داكشي تاع النحاس.
إوا كحل الراس قرا تاسخن عليه راسو و ألَّف بحوث وكتوبة حول "دوران الأجرام السماوية" وهي هاذيك دارو بيه صحاب السماوي حيث النظرية الجديدة لي جاب مفادها أن "الشمس مركز الكون"، وراكوم عارفين العطاية فينما مشيتي تلقاهم وصلوها سخونة وبميكتها للكنيسة وحتاو عليه مَّالين الوقت بات ماصبح، دوز شي يامات فالكاشو لعل وعسى يتوب ولكن خونا الرجولة منذ الطفولة عصبة ولد شوماندِفير، حلف مايتنازل على مبادئو واخا يقتلوه وبالفعل داكشي لي وقع شداتو الكنيسة وقامت عليه الحد، مات نهار 24 مايو 1543 وفعمرو 70عام وهادشي علاش قلت ليكم خونا "كحل الراس" حلف مايْلبَّدها تا جابها فراسو.
واللي سالا معايا فهاذ البلان أن العولامة المعاصرين ليه استهزأوا منو مزيان وكل واحد كايضحك حتى كايبانو ليه لاغاليغو زعما خونا رمَّان كان غي كايهترس، وتسنا العيلم 60عام من بعد تاجا السِّي كيبلر الله يجازيه بالخير برهن بلي خونا كوبرنيكوس ما قال غير كلام الحق ومانساوش تاسِّي غاليليو غاليلي تاهو عندو شي بركة أكد بيها صحة نظرية كوبرنيكوس "الشمس مركز الكون".
أونفاه المسامحة على الإطالة لكن العبرة من هادشي كامل، ملي تكون مآمن بشي فكرة ومقتانع بيها وبصحتها توكل عآلله وموت معاها واخا يكون العالم كامل ضدك.