مقال بالدارجة : كروصة لكل مواطن
برشيد الغد : زكرياء البرجي
قبل ما نديو و نجيبو في الكلام هاد المقال بالدارجة فقرة كل سيمانة كناقشو فيها موضوع ولا قضية ولا ظاهرة حيت جربنا كل الطرق باش نوصلو ميساج لاكن والو قلنا نجربو الدارجة على الله .
من الحويج الغريبة وكترت في مغربنا الحبيب و كلشي كيتشكا منها هي اصحاب الكرارص ديال الخضرة و الديسير في الزناقي و الدروبة ,
و هنا غندويو على برشيد لي عدنا زوج بلايص تعرفو بهاد القضية ، شارع عبد الله الشفشاوني و القيصارية ، هاذ زوج بلايص كلشي كيتشكا منهم و من الخنز و الصداع و الفوضى لي كيديرو و خصوصا شارع عبد الله الشفشاوني لي كلشي داوي عليه الكبير و الصغير إلا السي الباشا ، قمة احتلال الملك العام و الكرارص كتر من الباشار حيت كتلقا واحد عندو كتر من كروصة و مفرقهم على طول الشارع .
و الطامة الكبرى هي كتلقا شي وحدين ماشي من المدينة و جايين دايرين كروصة و لا زوج و منوضين حالة في الشارع و هاذ شي كلو على عينك يا بن عدي .
هاد الظاهرة لي موراها شلا مصايب و منهم كثرة الجريمة ، السرقة و الضرب و الجرح و تلقا واحد هاز سيف و يدور عريان و سط الشارع ، قطاع الطرق و ماداروهاش .
هاد الروينة و الناس المسؤولين مفيقينش من النعاس و مخلينها سيبا مرة مرة كيديرو حملة (مسرحية) فيها يومين و ترجع الدنيا كيف كانت ، تالين غنبقاو على هاد الحال؟
حنا ماشي ضد هاد الناس ولا نقطعوا ليهم رزقهم ، اولا الرزق بيد الله و ثانيا مدينة برشيد كبرات و بحال هاذ المناظر كيشوهو بيها ، نظمو راسنا شويا .