مقال بالدارجة : مارك ندم تا أسس الفايسبوك
برشيد الغد- زكرياء البرجي
قبل ما نديو و نجيبو في الكلام هاد المقال بالدارجة فقرة كل سيمانة ناقشو فيها موضوع ولا قضية ولا ظاهرة حيت جربنا كل الطرق باش نوصلو ميساج لاكن والو قلنا نجربو الدارجة على الله .
كما كنعرفو أن الفايسبوك هو موقع للتواصل الاجتماعي و على هاذ الأساس أسو مارك باش يتخلق واحد التواصل بين كل رواده و تسهيل هاذ الامر و حتى تبادل المعلومات .
لكن الموقع جا تال عند المغاربة و تقلبت ليه السمية و خصوصا هاد المدينة السعيدة (برشيد حشاك) و ولا سميتو موقع النفاق الاجتماعي ، ولا كلا يلغي بلغاه و بنادم عقلو خرج ، ها لي يسب و ها لي يتلمق اما الحسابات الوهمية كتر من سكان قطر .
حيت مبقيتي تفرق مابين الذكر و الانثى و عاد زيد دوك لي متعرفهم معامن كل مرة في حال و كل مرة على موقف ، هاهوما يسبو في شي مسؤول و يتبكاو و يتشكاو شويا يمدحو و يشكرو فيه و العام زين و الشتا صابة قمة سكيزوفرين و خلاص .
و مؤخرا ا سيدي خرجو لينا شي محللين و كتاب غا تا ناضو و لحد الان بغيت نعرف غا علاش داوين و شنو باغين يقولو ، لا عربية لا داريجة يمكن كما قال واحد الصديق عبرية و الله أعلم .
الله يهدي ما خلق و الله يدير شي تاويل تاع الخير أما لكان غا الفايسبوك حماض و تميع دخل ليه تشدك دارابوش .